Tervetuloa Lentovoima myseymhiin!

Lentovoima myseymmi on moderni tekninen ja kulttuurihistuurialinen myseymmi Ruottin militäärilennon kehityksestä. Täälä on yniikki kokoelma lentokonheita, varhaisesta 1900-luvun piunjääristä tämän päivän JAS 39 Gripenhiin.

Paitti näyttelyt alla kuvattuna meilä on kaks kolme satunhaista näyttelyitä joka vuosi. Met satsaama kans aktiivisheen ja elävhään prukrammitoiminthaan vuet ympäri ja saatama ottaa vasthaan ja opastaa porukoita useamala eri kielelä.

Restayranki Calle C tarjoaa lynsjiä ja fiikkaa jokka on laitettu lähialueen raaka-ainheila. Kesäsin ulkoserveerinki on auki ja leikkipaikka Leklanda on aivan laijala, niile vierhaile jolla on rauhattomat jalat.

Myseymmin kaupassa on mukavia ja mielekhäitä lahjoja, desainikampheita, leeksaakkia, lentokirjalisuutta ja modelli lentokonheita. Utelihaat jolla on lukuhalu vierailevat faktahuonetta missä on arkkiivi ja spesiaalikirjasto lennon histuuriasta.

Aukioloaijat

Septemberistä maihiin:
tiistai-pyhä 11.00-17.00
keskiviikko 11.00-20.00
maanantai kiini

Jyynistä aykysthiin:
tiistai-pyhä 11.00-17.00
keskiviikko 11.00-20.00

Hinnat

Vapa pääsy.

Telefuunibuukkaus

Telefuunibuukkaus suureman porukan vierailijoile. 
Maanantai-perjantai 09.30-11.00
Telefuuni: +46 (0)13-495 97 14

Löytää tänne

Lentovoima myseymmi on Carl Cederströms gata 2, Malmslättissä, noin 7 km läntheen Linköpingin sentrymistä. Ota aavfaartti 111 E4:sesta.

Bussi numero 13 matkailukeskuksesta.

Meilä on suuri ilmhainen parkkeerinki.

Salhaisia tokymenttiä – DC-3 joka katosi

Kruunujyveeli i Lentovoima myseymmin kokoelmissa on Ruottin DC-3 jonka Neuvostoliiton jahtilento ampui alas Itämerelä 1952. Jälkhiin rapea 50 vuen spekylasjuunia löyethiin vraakin meren pohjalta, veethiin ylös ja panthiin viimisheen rauhhaan myseymmissä. Näyttely Salhaiset tokymentit – DC-3 joka katosi on histuuria täynä mystiikkaa.

Jos sota tullee – Ruotti kylmän soan aikana

Jos sota tullee on kertomus kuinka Ruotti valmistautui sothaan joka ei koskhaan tullu. Mutta mitä mailma ootti ja valmistautui siihen yli neljä kymmentä vuotta. Se on näyttely atoomipommiprukrammista, ryssänpölöstä ja sukelusvenheen jahista. Mutta kans turvasta ja hyvinvoinista. Nostalkinen vierailee meän autenttisesti sisustettuja kotioloja ja saapi uuesti kokea 50-, 60-, 70- ja 80-luvut.

Ruottin militäärilento – piunjääriaijasta sotavalmistelu aikhaan

Näyttely Ruottin militäärilennon 1900-luvun ensi puolen histuuria sisältää Lentovoima myseymmin vanhiimat lentokonheet, kun Ö 1 Tummelisa ja M 1 Nieuport IV-G. Joka epookki kuvvaa ylheisen Ruottin ja ulkomailman tilanetta. Kuinka uhka oli ja kuinka Ruottin puolustuspolitiikka ja puolustusindystrii vastasi uhkhaan.

Lentolabbi – tietekeskus lennon teemasta

Lentovoima myseymmi on paikka missä tieto ja leikki kohtaavat ittesthään selvälä tavala. Lentolabissa, myseymmin tietekeskuksessa, on lentosimylaatturia ja eksperimenttiasemia joissa lento on teemana. Kuinkas se toimii lentojohontornissa ja kuinkas se tuntuu ette seisoa keskelä myrskyä? Tutki, kokeile istua, testaa ja piä hauskaa! Täälä on paljon tekemistä ja havattemista koko perheele.

Tervetuloa!